೭೨.ಹಾಕಿ - ಭಾರತದ ಹೆಮ್ಮೆಯ ಆಟ
ಭಾರತದ ಹಾಕಿ ಆಟ ಜಗತ್ತಿನ ಪ್ರಾಚೀನ ಆಟಗಳಲ್ಲೊಂದು. ಭಾರತದ ಹಾಕಿ ತಂಡ ಜಗತ್ತಿನ ಮುಂಚೂಣಿ ಹಾಕಿ ತಂಡಗಳಲ್ಲಿ ಒಂದಾಗಿದೆ. ಒಲಿಂಪಿಕ್ಸ್ ಹಾಕಿ ಸ್ಪರ್ಧೆಯಲ್ಲಿ ಅತ್ಯಂತ ಜಾಸ್ತಿ ಗೋಲುಗಳ ಅಂತರದಿಂದ ಜಯ ಸಾಧಿಸಿದ ದಾಖಲೆ ಇಂದಿಗೂ ಭಾರತದ ಹಾಕಿ ತಂಡದ ಹೆಸರಿನಲ್ಲಿದೆ - ೧೯೩೨ರ ಲಾಸ್ ಏಂಜೆಲ್ಸ್ ಒಲಿಂಪಿಕ್ಸ್ ಸ್ಪರ್ಧೆಯಲ್ಲಿ, ಭಾರತದ ಹಾಕಿ ತಂಡವು ಯುಎಸ್‌ಎ ಹಾಕಿ ತಂಡವನ್ನು ೨೪ - ೧ ಗೋಲುಗಳ ಅಂತರದಿಂದ ಸೋಲಿಸಿತ್ತು.  

ಭಾರತದ ಹಾಕಿ ತಂಡ, ಎಂಟು ಬಾರಿ ಒಲಿಂಪಿಕ್ ಚಿನ್ನದ ಪದಕ ಗಳಿಸಿದೆ. ೨೬ ಮೇ ೧೯೨೮ರಲ್ಲಿ ನೆದರ್-ಲ್ಯಾಂಡ್ ಹಾಕಿ ತಂಡವನ್ನು ಸೋಲಿಸುವ ಮೂಲಕ ಭಾರತದ ಹಾಕಿ ತಂಡ ಮೊದಲ ಒಲಿಂಪಿಕ್ ಚಿನ್ನದ ಪದಕ ಗಳಿಸಿತು. ಅನಂತರ ೧೯೬೦ರ ವರೆಗೆ ಭಾರತದ ಹಾಕಿ ತಂಡ ಜಗತ್ತಿನ ಹಾಕಿ ಸಾಮ್ರಾಟನಾಗಿ ಮೆರೆಯಿತು. ತದನಂತರ ಹಾಕಿ ಆಟದಲ್ಲಿ ವೇಗಕ್ಕೆ ಪ್ರಾಧಾನ್ಯತೆ ದೊರೆತ ಕಾರಣ ತನ್ನ ಪಾರಮ್ಯವನ್ನು ಕಾಯ್ದುಕೊಳ್ಳುವಲ್ಲಿ ಭಾರತದ ಹಾಕಿ ತಂಡ ಸಫಲವಾಗಿಲ್ಲ.

ಆಗಸ್ಟ್ ೨೦೨೧ರ ಟೋಕಿಯೋ ಒಲಿಂಪಿಕ್ಸಿನಲ್ಲಿ, ೪೧ ವರುಷಗಳ ನಂತರ ಭಾರತದ ಪುರುಷರ ಹಾಕಿ ತಂಡ ಕಂಚಿನ ಪದಕ ಗಳಿಸಿ, ದೇಶವಾಸಿಗಳಲ್ಲಿ ಹಾಕಿ ಆಟದ ಬಗೆಗಿನ ಆಸಕ್ತಿಗೆ ಜೀವತುಂಬಿದೆ.
ಫೋಟೋ: ಭಾರತ ಹಾಕಿ ಲಾಂಛನ; ಕೃಪೆ: ವಿಕಿಪೀಡಿಯಾ

೭೦.ಮಂಗಳ ಪರಿಭ್ರಮಕ ಮಿಷನ್ ಭಾರತದ ಬಾಹ್ಯಾಕಾಶ ಸಾಧನೆಯ ಮೈಲಿಗಲ್ಲು
ಮಂಗಳ ಗ್ರಹಕ್ಕೆ ಭಾರತದ ಪ್ರಥಮ ಅಭಿಯಾನ ಮಂಗಳಯಾನವು ೫ ನವಂಬರ್ ೨೦೧೩ರಂದು ಉಡಾಯಿಸಲ್ಪಟ್ಟಿತು. ಆಕಾಶಕ್ಕೆ ಜಿಗಿದ ೩೫೦ ಟನ್ ತೂಕದ ಇಸ್ರೋದ ರಾಕೆಟ್ ಮಾನವರಹಿತ ಘಟಕವನ್ನು ಮಂಗಳ ಗ್ರಹಕ್ಕೆ ಹೊತ್ತೊಯ್ದಿತು.

ವಿವಿಧ ಗ್ರಹಗಳತ್ತ ಭಾರತದ ಅಭಿಯಾನದ ವಿನ್ಯಾಸ, ಯೋಜನೆ, ಕಾರ್ಯಾಚರಣೆ ಮತ್ತು ಮೇಲುಸ್ತುವಾರಿಗೆ ಅಗತ್ಯವಾದ ತಂತ್ರಜ್ನಾನಗಳನ್ನು ಅಭಿವೃದ್ಧಿ ಪಡಿಸುವುದು ಪ್ರಥಮ ಮಂಗಳಯಾನದ ಪ್ರಧಾನ ಉದ್ದೇಶವಾಗಿತ್ತು.

ಅದೇ ವರುಷ ಯುಎಸ್‌ಎ ದೇಶದ “ನಾಸಾ" ಸಂಸ್ಥೆ ಹಾರಿಸಿದ ಇಂತಹದೇ ವಾಹಕ ಯೋಜನೆಯ ವೆಚ್ಚಕ್ಕೆ ಹೋಲಿಸಿದಾಗ, ಇಸ್ರೋದ ಮಂಗಳಯಾನ ಯೋಜನೆಯ ವೆಚ್ಚ ಅದಕ್ಕಿಂತ ೯ ಪಟ್ಟು ಕಡಿಮೆ ಅಂದರೆ ೭೪ ಮಿಲಿಯ ಡಾಲರ್.

೬೮.ಭಾರತದ ಬಾಹ್ಯಾಕಾಶ ಸಾಧನೆಗಳ ಹೆಮ್ಮೆಯ ಸಂಸ್ಥೆ “ಇಸ್ರೋ”
ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಒಂದಾದ ಮೇಲೊಂದರಂತೆ ಸಾಧನೆಗಳನ್ನು ಮಾಡುತ್ತಾ, ಬಾಹ್ಯಾಕಾಶದಲ್ಲಿ ದಿಟ್ಟ ಹೆಜ್ಜೆಗಳನ್ನಿಡುತ್ತಿದೆ. ಎಪ್ರಿಲ್ ೨೦೦೮ರಲ್ಲಿ, ಇಸ್ರೋದ ಪೋಲಾರ್ ರಾಕೆಟ್ (ಪಿಎಸ್‌ಎಲ್‌ವಿ - ಸಿ೯)  ಒಂದೇ ಜಿಗಿತದಲ್ಲಿ ಹತ್ತು ಉಪಗ್ರಹಗಳನ್ನು ಬಾಹ್ಯಾಕಾಶದ ಕಕ್ಷೆಗೆ ಏರಿಸಿದ್ದು ಅಭೂತಪೂರ್ವ ಜಾಗತಿಕ ದಾಖಲೆ. ೨೦೧೭ರ ಇಸ್ರೋದ ಸಾಧನೆಯಂತೂ ಜಗತ್ತನ್ನೇ ನಿಬ್ಬೆರಗಾಗಿಸಿತು; ರಾಕೆಟಿನ ಒಂದೇ ಜಿಗಿತದಲ್ಲಿ, ಕೇವಲ ೧೮ ನಿಮಿಷಗಳಲ್ಲಿ ೧೦೪ ಕೃತಕ ಉಪಗ್ರಹಗಳನ್ನು ಇಸ್ರೋ ಕಕ್ಷೆಗೆ ಏರಿಸಿತು!
ಫೋಟೋ: ಇಸ್ರೋದಿಂದ ಉಪಗ್ರಹಗಳ ಉಡಾವಣೆ - ೧೦೦ನೇ ಮಿಷನ್

೬೬.ಭಾರತದ ಮುಂಚೂಣಿ ಉದ್ಯಮ ಮಾಹಿತಿ ತಂತ್ರಜ್ನಾನ (ಐಟಿ)
ಮಾಹಿತಿ ತಂತ್ರಜ್ನಾನವು ಭಾರತದ ಉದ್ಯಮರಂಗದ ಚಿತ್ರಣವನ್ನೇ ಬದಲಾಯಿಸಿತು; ಮಾಹಿತಿ ತಂತ್ರಜ್ನಾನದಿಂದಾಗಿ ಭಾರತವು ಅನುಶೋಧಕ ಉದ್ಯಮಶೀಲರ ದೇಶವೆಂದು ಗುರುತಿಸಲ್ಪಟ್ಟಿತು.

ಭಾರತದ ಮಾಹಿತಿ ತಂತ್ರಜ್ನಾನ ಉದ್ಯಮವು ಸುಮಾರು ೨೫ ಲಕ್ಷ ಜನರಿಗೆ ನೇರ ಉದ್ಯೋಗ ಒದಗಿಸಿದೆ. ಆಧುನಿಕ ಜಗತ್ತಿನಲ್ಲಿ ಮಾಹಿತಿ ತಂತ್ರಜ್ನಾನದ ಮುಂಚೂಣಿ ದೇಶಗಳಲ್ಲಿ ಭಾರತ ಒಂದಾಗಿದೆ. ಅದಲ್ಲದೆ, ಜಗತ್ತಿನ ಬೃಹತ್ ಐಟಿ ಕಂಪೆನಿಗಳು ಭಾರತದಲ್ಲಿವೆ. ಭಾರತದ ಐಟಿ ಉದ್ಯಮವು ಜಗತ್ತಿನಲ್ಲೇ ಶ್ರೇಷ್ಠವಾದ ಮಾಹಿತಿ ತಂತ್ರಜ್ನಾನ ಪರಿಹಾರಗಳನ್ನೂ ವಾಣಿಜ್ಯ ಸೇವೆಗಳನ್ನೂ ಒದಗಿಸುತ್ತಿದೆ.

೧೯೯೧-೯೨ರ ಆರ್ಥಿಕ ಸುಧಾರಣೆಗಳ ನಂತರ, ಭಾರತ ಸರಕಾರ ಒದಗಿಸಿದ ಪ್ರೋತ್ಸಾಹ (ಕಡಿಮೆ ದರದಲ್ಲಿ ಕಚೇರಿ ನಿರ್ಮಾಣಕ್ಕಾಗಿ ಜಮೀನು ಒದಗಣೆ, ತೆರಿಗೆ ರಿಯಾಯ್ತಿ ಇತ್ಯಾದಿ) ಈ ಅಭೂತಪೂರ್ವ ಬೆಳವಣಿಗೆಗೆ ಕಾರಣ. ಭಾರತದ ಹಲವಾರು ಐಟಿ ಕಂಪೆನಿಗಳ ಸೇವೆ ಜಗತ್ತಿನ ಯಾವುದೇ ಮುಂಚೂಣಿ ಐಟಿ ಕಂಪೆನಿಯ ಸೇವೆಗೆ ಸರಿಸಾಟಿಯಾಗಿದೆ.
ಫೋಟೋ: ಜಗದ್ವಿಖ್ಯಾತ ಇನ್ಫೋಸಿಸ್ ಕಂಪೆನಿಯ ಬೆಂಗಳೂರು ಕಚೇರಿ