Organic Living

ಎಪ್ಪತ್ತು ವಯಸ್ಸಿನ ಅಜ್ಜಿ ಮುಂಜಾನೆ ಎದ್ದು, ಬಸ್ಸು ಹಿಡಿದು ಹಳ್ಳಿಯಿಂದ ಪೇಟೆಗೆ ಬಂದು, ಆಟೋರಿಕ್ಷಾ ಹತ್ತಿ, ಮಗನ ಮನೆಗೆ ಬಂದು ನೋಡುತ್ತಾರೆ – ಮಗ ಮತ್ತು ಸೊಸೆ ಆಗಲೇ ಕಾರು ಏರಿ, ನಾಲ್ಕು ವರುಷದ ಮೊಮ್ಮಗನೊಂದಿಗೆ ಎಲ್ಲಿಗೋ ಹೋಗಿದ್ದರು. ಅಜ್ಜಿ ಪಕ್ಕದ ಮನೆಗೆ ಹೋಗಿ ಕಾಯುತ್ತಾ ಕುಳಿತರು. ಮಧ್ಯಾಹ್ನದ ಹೊತ್ತಿಗೆ ಮಗ-ಸೊಸೆ  ಸುಸ್ತಾಗಿ ಮೊಮ್ಮಗನೊಂದಿಗೆ ವಾಪಾಸು ಬಂದರು.
“ಎಲ್ಲಿಗೆ ಹೋಗಿದ್ರಿ? ಎಂದು ಅಜ್ಜಿ ಕೇಳಿದಾಗ, ಒಂದೇ ಉಸಿರಿನಲ್ಲಿ ಮಗನ ಉತ್ತರ, “ಇವತ್ತು ದೊಡ್ಡ ರಾಮಾಯಣ ಆಯ್ತು. ಬೆಳಗ್ಗೆ ಮಗುವಿನ ಮೂಗಿನೊಳಗೆ ಅಂಗಿಯ ಬಟನ್ ಹೋಗಿ ಬಿಡ್ತು. ಅವನಿಗೆ ಉಸಿರಾಡೊದಕ್ಕೇ ಕಷ್ಟವಾಯ್ತು. ಏನ್ ಮಾಡಿದ್ರೂ ಬಟನ್ ಹೊರಗೆ ಬರಲಿಲ್ಲ. ಅದಕ್ಕೇ ಇ-ಎನ್-ಟಿ ಡಾಕ್ಟರಲ್ಲಿಗೆ ಹೋಗಿದ್ವಿ. ಅವರು ಕೊನೆಗೆ ಸಣ್ಣ ಆಪರೇಷನ್ ಮಾಡಿ, ಅವನ ಮೂಗಿಂದ ಆ ಬಟನ್ ಹೊರಗೆ ತೆಗೆದ್ರು. ಮೂರು ಸಾವಿರ ರೂಪಾಯಿ ಖರ್ಚಾಯ್ತು.”
“ಅಯ್ಯೋ, ಅದಕ್ಯಾಕೆ ಡಾಕ್ಟರ ಹತ್ರ ಹೋಗಿದ್ರಿ? ಇಷ್ಟಕ್ಕೆ ಆಪರೇಷನ್ ಬೇಕಾಗಿತ್ತಾ?” ಎಂಬುದು ಅಜ್ಜಿಯ ಪ್ರಶ್ನೆ. “ಮತ್ತೇನ್ ಮಾಡಬೇಕಾಗಿತ್ತು? ಮಗನ ಸವಾಲು. “ಮಗುವಿನ ಮೂಗಿಗೆ ಒಂದು ಚಿಟಿಕೆ ನಶ್ಯ ಹಾಕಿದ್ರೆ ಸಾಕಿತ್ತು. ಆಗ ಮಗೂಗೆ ಸೀನು ಬರ್ತಿತ್ತು. ಮಗು ಸೀನುವಾಗ ಮೂಗಿನೊಳಗಿಂದ ಬಟನ್ ಹೊರಕ್ಕೆ ಬರ್ತಿತ್ತು” ಎಂದು ಅಜ್ಜಿ ಹೇಳುತ್ತಿದ್ದಂತೆ ಮಗ ಪೆಚ್ಚಾಗಿದ್ದ.
ಆ ಅಜ್ಜಿಯದು ಪಾರಂಪರಿಕ ಜ್ನಾನಖಜಾನೆ. ಅಜ್ಜಿಯಿಂದ ಮೊಮ್ಮಕ್ಕಳಿಗೆ, ಅಮ್ಮನಿಂದ ಮಗಳಿಗೆ ದಾಟಿ ಬರುತ್ತಿದ್ದ ಇಂತಹ ಅನುಭವ ಭಂಡಾರ ಇಂದು ನಶಿಸಿ ಹೋಗುತ್ತಿದೆ.
ಮಕ್ಕಳ ಆರೋಗ್ಯ ಸ್ವಲ್ಪ ಹೆಚ್ಚುಕಡಿಮೆಯಾದರೂ, ಈಗ ತಂದೆತಾಯಿ ಧಾವಿಸುವುದು ಆಲೋಪತಿ ವೈದ್ಯರ ದವಾಖಾನೆಗೆ. ಆ ಡಾಕ್ಟರು ಕೊಡುವುದು ರಾಸಾಯನಿಕ ಔಷಧಿಗಳನ್ನು. ಅವುಗಳ ಬಳಕೆಯಿಂದ ಹಲವಾರು ಅಡ್ಡಪರಿಣಾಮಗಳು. ಇವುಗಳ ಶಮನಕ್ಕೆ ಇನ್ನಷ್ಟು ರಾಸಾಯನಿಕ ಔಷಧಿಗಳ ಬಳಕೆ. ಅಂತೂ ಈ ವಿಷವರ್ತುಲದ ಸುಳಿಯಲ್ಲಿ ಹೆಚ್ಚೆಚ್ಚು ಜನರು ಸಿಲುಕುತ್ತಿದ್ದಾರೆ.

“ಎರಡು ಸಾವಿರ ರೂಪಾಯಿ ಕೊಟ್ಟು ಇದರ ಒಂದು ಗಿಡ ತಂದಿದ್ದೆ” ಎಂದು ಗಿಡವೊಂದನ್ನು ತೋರಿಸುತ್ತಾ ನಮ್ಮ “ಸಾವಯವ ಕೃಷಿಕ ಗ್ರಾಹಕ ಬಳಗ”ದ ಕೃಷಿಕರೊಬ್ಬರು ಹೇಳಿದ್ದರು! ಅದು ಚಾಯಾ ಮಾನ್ಸಾ ಗಿಡ.  

ಅನಂತರ ಅದರ ಬಗ್ಗೆ ಸಂಗ್ರಹಿಸಿದ ಮಾಹಿತಿ: ಅದು ಜಗತ್ತಿಗೆ ದಕ್ಷಿಣ ಅಮೇರಿಕಾದ ಪುರಾತನ “ಮಾಯಾ” ನಾಗರಿಕತೆಯ ಜನರ ಕೊಡುಗೆ ಎಂಬ ಸಂಗತಿ. ಮೆಕ್ಸಿಕೋ ಮತ್ತು ಮಧ್ಯ ಅಮೇರಿಕಾದ ದೇಶಗಳಲ್ಲಿ ಸೊಪ್ಪು ತರಕಾರಿಯಾಗಿ ಇದರ ಬಳಕೆ. ಇದರ ಗೆಲ್ಲುಗಳನ್ನು ಕತ್ತರಿಸಿದಾಗ ಬಿಳಿ ಬಣ್ಣದ ದ್ರಾವಣ ಒಸರುತ್ತದೆ.  

2020ರ ಮಳೆಗಾಲದಲ್ಲಿ ಅದರ ನಾಲ್ಕು ತುಂಡುಗಳನ್ನು ತಲಾ ರೂ.20 ಬೆಲೆಗೆ ಖರೀದಿಸಿ ತಂದು, ಮಂಗಳೂರಿನ ನಮ್ಮ ಕೈತೋಟದಲ್ಲಿ ನೆಟ್ಟೆ. ಅವುಗಳಿಂದಲೇ ಇನ್ನೂ ನಾಲ್ಕು ತುಂಡುಗಳನ್ನು ಅಡ್ಡೂರಿನ ತೋಟದಲ್ಲಿಯೂ ನೆಟ್ಟೆ. ಅವೆಲ್ಲವೂ ಸೊಂಪಾಗಿ ಬೆಳೆದಿವೆ. ಪ್ರತಿಯೊಂದು ಗಿಡದಲ್ಲಿಯೂ 20 - 30 ಗೆಲ್ಲುಗಳಿವೆ.

ಒಂದಡಿ (ಮೂವತ್ತು ಸೆಮೀ.) ಉದ್ದದ ತುಂಡುಗಳು ನೆಡುವುದಕ್ಕೆ ಸೂಕ್ತ. ಅವನ್ನು ಬಹಳ ಸುಲಭವಾಗಿ ಬೆಳೆಸಬಹುದು. ವರುಷಕ್ಕೆ ಎರಡು ಸಲ ಗಿಡವೊಂದಕ್ಕೆ ಒಂದು ಮುಷ್ಟಿ ಸಾವಯವ ಗೊಬ್ಬರ ಹಾಕಿ, ವಾರಕ್ಕೆರಡು ಸಲ ನೀರೆರೆದರೆ ಸಾಕು; ನಳನಳಿಸುತ್ತ ಬೆಳೆಯುತ್ತದೆ. ಆರಡಿ ಎತ್ತರಕ್ಕೆ ಬೆಳೆಯುವ ಗಿಡ ಇದು. ಕತ್ತರಿಸಿದಷ್ಟೂ ಹೊಸ ಗೆಲ್ಲುಗಳು ಮತ್ತು ತೆಗೆದಷ್ಟೂ ಎಲೆಗಳು ಚಿಗುರುವುದು ಇದರ ವಿಶೇಷತೆ. ಇದಕ್ಕೆ ಯಾವುದೇ ಕೀಟ ಅಥವಾ ರೋಗ ಬಾಧೆ ಇಲ್ಲವೆನ್ನಬಹುದು.

ಕೈತೋಟದಲ್ಲಿ ಒಂದು ಗಿಡವಿದ್ದರೆ ವಾರಕ್ಕೊಮ್ಮೆ ಎಲೆಗಳು ಅಡುಗೆಗೆ ಲಭ್ಯ. ಒಮ್ಮೆಗೆ ಶೇಕಡಾ 50ರಷ್ಟು ಎಲೆ ಕೊಯ್ಯಬಹುದು.
ಒಬ್ಬರಿಗೆ ಐದು ಎಲೆಗಳಂತೆ ಅಡುಗೆಗೆ ಬಳಸುವುದು ಸೂಕ್ತ. ಪಲ್ಯ, ಸಾಂಬಾರ್, ಸೂಪ್ ಮಾಡುವಾಗ ಇದರ ಹಸುರು ಎಲೆಗಳನ್ನು ಇತರ ತರಕಾರಿಗಳೊಂದಿಗೆ ಸೇರಿಸಿ ಬೇಯಿಸಿದರೆ ಚೆನ್ನಾಗಿರುತ್ತದೆ. ಸಲಾಡ್‌ಗಳಿಗೂ ಇದರ ಬೇಯಿಸಿದ ಎಲೆ ಹಾಕಬಹುದು; ಯಾಕೆಂದರೆ ಇದರ ಎಲೆಗಳಿಗೆ ಪ್ರತ್ಯೇಕ ರುಚಿ ಇಲ್ಲ. ಅಡುಗೆಗೆ ಎಳೆಯ ಎಲೆಗಳು ಸೂಕ್ತ. ಎಲೆಗಳನ್ನು ಇಪ್ಪತ್ತು ನಿಮಿಷಗಳಾದರೂ ಬೇಯಿಸಲೇ ಬೇಕು.

ಸಸ್ಯಶಾಸ್ತ್ರೀಯ ಹೆಸರು: Sauropus androgymus
ಇಂಗ್ಲಿಷ್ ಹೆಸರು: ಮಲ್ಟಿವಿಟಮಿನ್ ಪ್ಲಾಂಟ್

ಮಲೇಷ್ಯಾ ಮೂಲದ ಚಕ್ರಮುನಿ “ಬಹುಜೀವಸತ್ವಗಳ ಸಸ್ಯ” ಎಂದೇ ಜನಪ್ರಿಯ. ಕಡು ಹಸುರು ಎಲೆಗಳನ್ನು ಹೊಂದಿರುವ ಇದು 2ರಿಂದ 3.5 ಮೀಟರ್ ಎತ್ತರಕ್ಕೆ ಬೆಳೆಯುವ ಸಣ್ಣ ಪೊದೆ. ಇದರ ರೆಂಬೆಗಳು ಮೃದು. ರೆಂಬೆಗಳ ಉದ್ದಕ್ಕೂ ಸಂಯುಕ್ತ ಕಿರುಎಲೆಗಳು.

ಇದರ ಎಲೆಗಳಿಂದ ತಯಾರಿಸಿದ ತಂಬುಳಿ ಮತ್ತು ಚಟ್ನಿ ಬಹಳ ರುಚಿ. ಅನ್ನದೊಂದಿಗೆ ಕಲಸಿ ಉಣ್ಣಲು ಅಥವಾ ಇಡ್ಲಿ, ದೋಸೆ, ಅಂಬಡೆ, ವಡೆ, ರೊಟ್ಟಿ ಇತ್ಯಾದಿ ತಿನಿಸುಗಳೊಂದಿಗೆ ನೆಚ್ಚಿಕೊಳ್ಳಲು ಸೂಕ್ತ. ಇದರ ವಡೆಯನ್ನೂ ಚಪ್ಪರಿಸಿ ತಿನ್ನಬಹುದು. ಚಕ್ರಮುನಿಯ ಎಲೆಗಳು ಕೆಲವೆಡೆ ಪಶುಗಳ ಮತ್ತು ಕೋಳಿಗಳ ಆಹಾರ ತಯಾರಿಗೆ ಬಳಕೆ. ಪ್ರತಿ ಮನೆಯಲ್ಲಿಯೂ ಇದನ್ನು ಬೆಳೆಸುವುದು ಒಳ್ಳೆಯದು. ಇದರ ಎಲೆಗಳಿಂದ ತಂಬುಳಿ, ಚಟ್ನಿ, ಪಲ್ಯ, ತೊವ್ವೆ, ಸಾರು ಅಥವಾ ಸಾಂಬಾರು ಮಾಡಿ, ವಾರಕ್ಕೆ ಒಂದೆರಡು ಬಾರಿ ಸೇವಿಸುವುದರಿಂದ ಮಹಿಳೆಯರ ಹಾಗೂ ಮಕ್ಕಳ ಜೀವಸತ್ವ ಕೊರತೆ ನೀಗಿಸಲು ಸಹಾಯ. ಯಾಕೆಂದರೆ ಇದರ 100 ಗ್ರಾಮ್ ಸೊಪ್ಪಿನಲ್ಲಿದೆ 7.4 ಗ್ರಾಮ್ ಸಸಾರಜನಕ, 23 ಮಿ.ಗ್ರಾ. ಕಬ್ಬಿಣಾಂಶ, 200 ಮಿ.ಗ್ರಾ. ರಂಜಕ ಮತ್ತು 571 ಮಿ.ಗ್ರಾ. ಸುಣ್ಣಾಂಶ. ಜೊತೆಗೆ ಇದು “ಎ”, “ಬಿ” ಮತ್ತು “ಸಿ” ವಿಟಮಿನ್-ಗಳ ಆಕರ.

ಚಕ್ರಮುನಿ ಗಿಡಗಳಿಗೆ ಎರಡು ದಿನಕ್ಕೊಮ್ಮೆಯಾದರೂ ನೀರುಣಿಸಬೇಕು. ಗಿಡಗಳನ್ನು ನೆಟ್ಟು 3ರಿಂದ 4 ತಿಂಗಳಿನಲ್ಲಿ ಸೊಂಪಾಗಿ ಪೊದೆಯಾಗಿ ಬೆಳೆಯುತ್ತದೆ. ಅನಂತರ ವಾರಕ್ಕೊಮ್ಮೆ ಇದರ ಸೊಪ್ಪು ತೆಗೆದು ಅಡುಗೆಗೆ ಉಪಯೋಗಿಸ ಬಹುದು. ಎರಡು-ಮೂರು ವಾರಕ್ಕೊಮ್ಮೆ ಸೊಪ್ಪಿನ ಕೊಯ್ಲು ಮಾಡಿದರೆ, ಒಂದು ಗಿಡದಿಂದ ಎರಡು ಕಿಲೋಗ್ರಾಮ್ ಸೊಪ್ಪು ಲಭ್ಯ. ಆರು ತಿಂಗಳಿಗೊಮ್ಮೆ ಗಿಡಗಳನ್ನು ಸವರುವುದು ಹೆಚ್ಚು ಗೆಲ್ಲುಗಳು ಮೂಡಲು ಸಹಕಾರಿ.

ಔಷಧೀಯ ಬಳಕೆ:
-ವಿಟಮಿನ್-ಗಳ ಕೊರತೆಯಿಂದ ಬಳಲುವವರು ಪ್ರತಿದಿನ ಚಕ್ರಮುನಿಯ ಹಸಿ ಎಲೆಗಳನ್ನು ತಿನ್ನುವುದು ಆರೋಗ್ಯ ಸುಧಾರಣೆಗೆ ಸಹಕಾರಿ. ಎರಡು ಚಮಚ ಸೊಪ್ಪಿನ ರಸ ಮತ್ತು ಒಂದು ಚಮಚ ಜೇನು ಬೆರೆಸಿ ಬೆಳಗ್ಗೆ ಆಹಾರ ಸೇವನೆ ಮುಂಚೆ ಕುಡಿಯುವುದು ಪರಿಣಾಮಕಾರಿ.

ವಿಷಪೀಡೆನಾಶಕಗಳಿಂದ ಮಾನವಕುಲದ ಮಾರಣ ಹೋಮ
ಢೆಲ್ಲಿಯ ವಿಜ್ನಾನ ಮತ್ತು ಪರಿಸರ ಕೇಂದ್ರ (ಸೆಂಟರ್ ಫಾರ್ ಸೈನ್ಸ್ ಆಂಡ್ ಎನ್‍ವೈರನ್‍ಮೆಂಟ್) ಪರಿಸರ ರಕ್ಷಣೆಗಾಗಿ ಹಲವಾರು ದಿಟ್ಟ ಹೆಜ್ಜೆಗಳನ್ನಿಟ್ಟ ಸಂಸ್ಥೆ. ದಿವಂಗತ ಅನಿಲ್ ಅಗರ್‍ವಾಲ್ ಸ್ಥಾಪಿಸಿದ ಸಂಸ್ಥೆಯ ಪಾಕ್ಷಿಕ “ಡೌನ್ ಟು ಅರ್ಥ್” ಪರಿಸರಕ್ಕೆ ಧಕ್ಕೆಯಾಗುವ, ಮಾನವಕುಲಕ್ಕೆ ಕುತ್ತಾಗುವ ಸಂಗತಿಗಳನ್ನು ವೈಜ್ನಾನಿಕ ವರದಿಗಳು, ಅಧ್ಯಯನಗಳು ಮತ್ತು ಪುಸ್ತಕಗಳು ಹಾಗೂ ವೆಬ್‍ಸೈಟ್ ಮೂಲಕ ಜಾಗತಿಕ ಮಟ್ಟದಲ್ಲಿ ಜಾಹೀರು ಮಾಡುತ್ತಿರುವ ಪತ್ರಿಕೆ.
ಇದು ೧೯೭೭ರಲ್ಲೇ ಪ್ರಕಟಿಸಿರುವ ಪುಸ್ತಕ: “ಹೊಮಿಸೈಡ್ ಬೈ ಪೆಸ್ಟಿಸೈಡ್ಸ್” (ಪೀಡೆನಾಶಕಗಳಿಂದ ಮನುಷ್ಯರ ಕೊಲೆ). ಇದರ ಉಪಶಿರ್ಷೀಕೆ “ವಾಟ್ ಪೊಲ್ಯೂಷನ್ ಡಸ್ ಟು ಅವರ್ ಬಾಡೀಸ್” (ಪರಿಸರ ಮಾಲಿನ್ಯ ನಮ್ಮ ದೇಹಗಳಿಗೆ ಏನು ಮಾಡುತ್ತದೆ?) ೧೩೪ ಪುಟಗಳ ಈ ಪುಸ್ತಕ ಒಂದೇ ಸಾಕು: ವಿಷಪೀಡೆನಾಶಕಗಳು ಹೇಗೆ ಮಾನವಕುಲದ ಮಾರಣಹೋಮ ಮಾಡುತ್ತಿವೆ? ಎಂಬುದರ ಬಗ್ಗೆ ನಮ್ಮ ಕಣ್ಣು ತೆರೆಸಲು. ಪುಸ್ತಕದ ಕೊನೆಯಲ್ಲಿ ಪಟ್ಟಿ ಮಾಡಲಾಗಿದೆ ೧೦೦ ಆಕರ ಲೇಖನಗಳನ್ನು; ಅವುಗಳಲ್ಲಿ ಪ್ರತಿಯೊಂದೂ ಸತ್ಯದ ಸುತ್ತಿಗೆಯಿಂದ ನಮ್ಮ ತಲೆಗೆ ಹೊಡೆದು ನಮ್ಮನ್ನು ಬೆಚ್ಚಿ ಬೀಳಿಸುತ್ತದೆ. ಈಗೊಂದು ಪ್ರಶ್ನೆ: ಪೀಡೆನಾಶಕಗಳ ವಿಷದಿಂದ ಭಾರತದಂತಹ ಮಹಾನ್ ದೇಶದಲ್ಲಿ ಎಷ್ಟು ಸಾವುಗಳಾಗುತ್ತಿವೆ? ರಾಷ್ಟ್ರೀಯ ಅಪರಾಧಗಳ ದಾಖಲೆ ಬ್ಯುರೋ ಪ್ರಕಟಿಸಿದ ಮಾಹಿತಿ ಪ್ರಕಾರ, ೨೦೧೫ರಲ್ಲಿ ೭,೦೬೦ ಸಾವುಗಳಾಗಿವೆ!  (ಗಮನಿಸಿ: ಕಲಬೆರಕೆ ಮತ್ತು ದುರುದ್ದೇಶದ ದುರ್ಬಳಕೆಯಿಂದ ಆಗುವ ಸಾವುನೋವುಗಳದ್ದು ಬೇರೆಯೇ ಸಂಗತಿ.)
ಇಷ್ಟೆಲ್ಲ ಪುರಾವೆಗಳಿದ್ದರೂ, ಮಾನವಕುಲಕ್ಕೆ ಮಾರಕವಾದ ವಿಷಪೀಡೆನಾಶಕಗಳನ್ನು ನಮ್ಮ ದೇಶದಲ್ಲಿ ನಿಷೇಧಿಸಲಿಲ್ಲ. ಸುಮಾರು ೮೦ ದೇಶಗಳು ನಿಷೇಧಿಸಿದ ವಿಷಪೀಡೆನಾಶಕಗಳನ್ನು ನಮ್ಮ ದೇಶದಲ್ಲಿ ನಿಷೇಧಿಸಲಿಲ್ಲ! ಯಾಕೆಂದರೆ, ಪೀಡೆನಾಶಕಗಳ ಕಂಪೆನಿಗಳದ್ದು ವರುಷಕ್ಕೆ ಸುಮಾರು ೫೦,೦೦೦ ಕೋಟಿ ರೂಪಾಯಿಗಳ ದಂಧೆ!