ಒಬ್ಬ ರಾಜನಿಗೆ ಸಂಗೀತವೆಂದರೆ ಪಂಚಪ್ರಾಣ. ಅವನು ಅತ್ಯುತ್ತಮ ಸಂಗೀತವಾದ್ಯಕ್ಕಾಗಿ ಜಗತ್ತಿನಲ್ಲೆಲ್ಲ ಹುಡುಕಾಡುತ್ತಿದ್ದ. ಒಮ್ಮೆ ಒಬ್ಬ ಮ್ಯಾಜಿಕ್ ಮಾಡುವಾತ ರಾಜನಿಗೊಂದು ಹಾರ್ಪ್ ಎಂಬ ಸಂಗೀತವಾದ್ಯ ಕೊಟ್ಟ. ರಾಜ ಅದನ್ನು ಸಂತೋಷದಿಂದ ಅರಮನೆಗೆ ತಂದ. ಆದರೆ ರಾಜ ಹಾರ್ಪನ್ನು ನುಡಿಸಲು ಪ್ರಯತ್ನಿಸಿದಾಗ ಅದರಿಂದ ಸ್ವರಗಳು ಹೊರಡಲೇ ಇಲ್ಲ. ರಾಜನಿಗೆ ಬೇಸರವಾಗಿ ಅದನ್ನು ಅರಮನೆಯ ಉದ್ಯಾನದ ಹೊರಕ್ಕೆ ಎಸೆದ.

ಅಲ್ಲಿ ಹಾದು ಹೋಗುತ್ತಿದ್ದ ಬಡ ಹುಡುಗಿಯೊಬ್ಬಳಿಗೆ ಆ ಹಾರ್ಪನ್ನು ಕಂಡು ಅಚ್ಚರಿಯಾಯಿತು. ಅವಳಿಗೆ ಅದನ್ನು ನುಡಿಸುವುದು ಹೇಗೆಂದು ತಿಳಿದಿರಲಿಲ್ಲ. ಆದರೂ ಅವಳು ಅದನ್ನು ಮನೆಗೆ ಒಯ್ದಳು. ಅದರಿಂದ ಸಂಗೀತ ನುಡಿಸಲು ಮತ್ತೆಮತ್ತೆ ಪ್ರಯತ್ನಿಸಿದಳು. ಕೊನೆಗೊಮ್ಮೆ ಆ ಹಾರ್ಪಿನಿಂದ ಸುಮಧುರ ಸಂಗೀತ ಹೊರಹೊಮ್ಮಿತು. ಅದೊಂದು ಮ್ಯಾಜಿಕ್ ಹಾರ್ಪ್! ಅದನ್ನು ನಂಬಿ, ಶ್ರದ್ಧೆಯಿಂದ ಪ್ರಯತ್ನಿಸಿದವರ ಕೈಯಲ್ಲಿ ಅದು ಸುಶ್ರಾವ್ಯ ಸಂಗೀತ ಹೊಮ್ಮಿಸುತ್ತದೆ. ಅವಳು ಪ್ರತಿ ದಿನ ಆ ಹಾರ್ಪಿನಿಂದ ಗಂಟೆಗಟ್ಟಲೆ ಅದ್ಭುತ ಸಂಗೀತ ನುಡಿಸಲು ಶುರು ಮಾಡಿದಳು. ಕೊನೆಗೆ ಈ ಸುದ್ದಿ ರಾಜನ ವರೆಗೆ ತಲಪಿತು. ಆತ ಆ ಹುಡುಗಿಯನ್ನು ಅರಮನೆಗೆ ಕರೆಸಿದ; ಅವಳು ಹಾರ್ಪಿನಿಂದ ಮನಮೋಹಕ ಸಂಗೀತ ನುಡಿಸುವುದನ್ನು ಕೇಳಿ ಖುಷಿ ಪಟ್ಟ. ಆ ಹುಡುಗಿಗೂ ಅವಳ ಕುಟುಂಬಕ್ಕೂ ಬಹುಮಾನಗಳನ್ನಿತ್ತು, ಅವಳನ್ನು ರಾಜಸಭೆಯ ಸಂಗೀತಗಾರಳನ್ನಾಗಿ ನೇಮಿಸಿದ.